PENGAJIIAN ADAT
Meliputi namo dikumenyan, kayu ranak la kayu rani, kayu rajo yang tigo silo, kayu tuenku yang sati-sati, kayu tuenku yang dikuramat, la bangka nyu gedang tempat dibusilo, batangnyo gedang tempat dibusanda, daunnyo rimbun tempat buteduh diwaktu kupanasan, taprarun kupado api, salindung Allah namo apinyo, seru Allah namo asapnyo, menyeru ruh yang sati-sati, menyeru ruh yang dikuramat, meresap kupado tujuh top putalo langit, meresap kupado tujuh top putalo bumi, muresap kupado Ambia Allah, muresap kupado Allah.
Ado dih Mulayu ngato:Pepat-dipepat batang kududuk serupo dinge batang ubi, orang mungalah dikoto tebat, masak padi uhang talang lindung, lambio dipanjat jangan, sadu sirapet kito dinge duduk sadu dilingkung umah ini, kupado Allah kito mintak tubat, kupado Nabi kito mintak safa’at, kupado manusio kito minta ma’af.
Duo dih Mulayu ngato:
Pepat-dipepat batang kududuk serupo dinge batang ubi, jalan teruh kupadong lalang teruh lagi kupadong ubi, sadu sirapet kito dinge duduk sadu dilingkung umah ini, kito mungiri kato teliti, kalu salah mintak disapo, kalu bena mintak didiri.
Tigo dih Mulayu ngato:
Nak ili ke Indra Giri, singgah burenti Koto Malako, sembah kami sadu dinge ngaji, ngaji adat ngaji dipusako, sudah dipakai urang tuo-tuo, supayo adat mak nyu nyato, supayo serak mak nyu nyalo.
Empat dih Mulayu ngato:
Bungken genap munahan uji, hukum adil munahan banding, kalunyu adil hakim bara banding, adat dengan serak samo lah dikaji.
Limo dih Mulayu ngato:
Burung pirak terbang kusasak, tibo disasak hinggap di capo, semenjak diku ninek turun ku mamak, tibo dimamak turun ke kito. Buruk li bara ganti li, buruk pua jalipo tumbuh, rebah kayu aro jilatang bangkit, hilang cincin para mato timbun, disitu besi taralantakkan papan, disitulah dawat taralukiskan batu, idaknyo lapuk kurano hujan, idaknyo lekang kurano paneh, dinge diasak la idak mati, dinge diangguk idak layu, dinge tibangka dari bumi, dinge tacurek dari langit beku didalam karasatio.
Lamago itu empat para karo:
Paratamo : Lamago Dapur
Kaduo : Lamago Kurung
Katigo : Lamago Nagari
Kaempat : Lamago Alam
Mano dikato Lamago Dapur?
Iyo didalom isi umah kito. Bagi mano isi umah kito? Ninik mamak surang, depati surang, anak jantan surang. Kalu nyu tumbuh silang salisih, bagi mano dawahnyo? Kito dawah dalam mupakat. Bagi mano kajinyo? Kito kaji dalam barunding, mano nge tinggi maknyu endah, mano nge gedang maknyu kecik, mano dinge kecik maknyu abih. Mano tempat kito bukaji? Tebu bubalut dinge daun nangko, balumak dinge getah, tau air belum beriak, daun kayu belum baringgung, kuaso ikan kurano ideh, kuaso burung kurano sayap. Manen bunyi kajinyo? Ngekeh kerbau dinge kulit, ngekeh manusio dinge ninik mamak tau-tau pati penghulu. Apu namo kampungnyo? Namo kampung buah tamanggi. Apu namo meh angusnyo? Meh Sapetai meh angusnyo.
Kaduo Lamago Kurung, bagi mano tumbuhnyo? Iyo didalom kurung kampung kito, atap busanggit mendun batumbuk, lebuh baulong samo diuni, samo tigenang samo dicauk, laman buresih samo di tempuh, anak buah anak dipunakan samo di apah dalam nagari. Kalu tumbuh silang salisih, bagi mano la dawahnyo? Kito dawah dalam pasko. Bagi mano la kajinyo? Kalunyu luko kito pampeh, kalunyu mati kito bangun, lemban balu tepung tawa, kundur batang sandaran bangun. Bagi mano panyudahannyo? Atehnyu mbuk samo mbuk, atehnyu suko samo suko. Apo bunamo lah kampungnyo? Namo kampung di ulu air, keruh air jingok ke ulu, nyintung air jingok ke maro. Apu namo meh angusnyo? Meh sakundi meh angusnyu.
Katigo Lamago Nagari, bagi mano tumbuhnyo? Iyo didalom parit basudut empat, dipegang purbukalo bungkan yang empat, tigo luhah isi nagari. Kalunyu tumbuh silang salisih, bagi mano dawahnyo? Kito dawah dalam batang pusako. Bagi mano kajinyo? Tasungkut keno, tabalik lepeh, iyo mumbaya idak basudah. Manen bunyi kajinyo? Beneh satingkin ampo saganggam, bah ke kiri menang ke kanan, alah suci menang bibeh, beruk dirimbo keno susu, anak di pangku keno buang, kato pusako idak bulih di asak, mencari sap dinge jirami, mencari tunggun dinge maruan, mencari tuneh dinge pamarap. Kalu idak nyado dinge sadu itu? Bia sabilik mumbaok padi, padi ampo; bia saguci mumbaok meh, meh lancung; Apu namo kampong nyu? Namo kampung batu dipulau. Apu namo meh angusnyo? Meh sameh meh tanjuk batimbo, kalunyu lalu nyu nak muput, tabalik nyu nak ngenai, idak ujung pangkan mumakan, idak kait tupang mungenai, idak tajuk taji mumakan.
Ado dih Mulayu ngato:
Tali teguh tempat dibugantung, kato bena tempat dipucayo, kalunyu dapat kato sio-sio serahkan sajo kupado untung (Tuhan).
Duo dih Mulayu ngato:
Bunyi ketik garugo bandung, bunyi tarik garugo utang, dinge titik lah ditampung, dinge mirih lah dilikam. Warih nak dijawat, walipah nak dijunjung, turun tamurun gili menggili, sejak dahulu sampai sakarang, disitu besi taralantakkan papan, disitu dawat taralukiskan batu, idaknyu lapuk dikurano hujan, idaknyu lekang dikurano paneh, dinge di asak idak mati dinge diangguk idak layu, dinge tabangkah dari bumi, dinge tacurek dari langit, beku didalom karasatio.
Keempat Lamago Alam,
Bagimano tumbuhnyo? Bungkan batumbuk samo bungkan, nagari batumbuk samo nagari, mandapo batumbuk samo mandapo. Kalunyu tumbuh silang salisih, bagimano dawahnyo? Kito dawah dalam yang ba undang. Bagimano kajinyo? Sari ado sari bunamo, sari mati sari bugela, sari guntur sari kilat, sari batepuk talingo angat, sari mati sari balanjo, sari batakuk parmen tanah, bukit didaki lurah diturun, kreh ditakik lunak disudu, jingok punakin balik punurun, jingok padang sibalik rimbo, jingok udang sibalik batu. Idak jugo sedang disitu! Idak buremeh bungkan di asah, idak bubereh atah dikisai, idak bukayu jenjang di engkah, pakaro ini dimajukan jugo. Idak jugo sedang disitu! Bia tabesit di bawong abang, tunggak kudateh bubung kubawah, lah kito tuik lak kito tanyo, bapasir ili bapadang mudik. Idak jugo sedang disitu! Kalu buranyut bak air, kalu bak ile mak kalam, batali aluh bacitak lemah, naik balai turun mundapo, jingok masjid yang duo beleh, kito tekin kutanah riang, lik bukit kajang selapak. Idak jugo sedang disitu! Undang-undang butali galeh, taliti butali semat, dukung bareh jago sangu, balantak tajuk ile ke banda Jambi, jinjek semat yang duo puluh, baratamu dengan rajo kito batigo urang.
Manolah Rajo yang batigo urang?
Paratamo : Pangeran Sukarto
Kaduo : Pangeran Suko Jayo
Katigo : Pangeran Tamanggung
Undang-undang turun dari Minang Kabau, Taliti mudik dari banda Jambi, Adat yang empat datang dari Kerinci, baratamu dibukit jumbak, bukit jumbak paratamuan undang, Tanjung samalindu parmen besi, lik abai saruntung manau, lik galanggang yang tigo sudut, lik macang yang sebaun, lik bukit anggaran takuluk, pamatang paradun lah pau uso, disitukan dadap baradurikan meh, antau parben limau kapeh, koto batu baralun ile, koto lunang baralun mudik, undang balik ke Minang Kabau, taliti ile ke banda Jambi, adat yang empat balik ke alam Kerinci, serak bumubung naik kelangit, pasko jatuh ke batang antau, lik batin yang sembilan, tentang batu yang duo beleh.
Apo dendam undang-undang tinggan? Apo pesan taliti balik? Apo umanah serak tinggan? Dendam undang-undang tinggan, meh sa meh tinggan dikito, kalunyu kusut tempat bausai, kalunyu rengang tempat basusun, kalunyu silang tempat bapatut, kalunyo sarang tempat babagih, sekutu dibelah duo, terjun kito punaik, buruk di baru, kumuh disesah, salah tarik mengembali, salah pakai dipaluluh, salah makan dimuntahkan, tumbuh dicupak dilihati, tumbuh di adat disusuni, tumbuh dibatang pasko samo didaki, tumbuh di undang samo dikerasi, tumbuh diserak samo dikaji.
Apolah pesan taliti balik? Salah pauk memberi pampeh, salah bunuh memberi bangun, nak bubini isi adat isi pusako, nak lari tuang lamago.
Ado Dih Mulayu Ngato:
Tanjung pauh munanam kapeh sungai penuh munanam timun, orang piantau mumbao air, sapu dinge mauk itu dinge mampeh, sapu dinge munuh itu dinge mangun sapu dinge barutang itu dinge mayi.Apo umanah serak tinggan? Suruh dikerjo tegah dihenti, sah dipakai batal dibuang.
Tatkalo maso agi dulu, sapu dinge paratamo munyambut warih adolah rajo batigo urang:
Paratamo : Rajo Kalipan
Kaduo : Rajo Karban
Katigo : Rajo Karton
Manolah pegang Rajo Kalipan?
Megangkan sungai sembilan batang. Manolah sungai sembilan batang?
Paratamo, Batang Tebo;
Kaduo, Batang Bungo;
Katigo, Sungai Tabir;
Kaempat, Palepat yang Selamat;
Kalimo, Bukit Lancup; Kaenam, Seling;
Katujuh, Rantau Limau Manih;
Kalapan, Maro Masumai;
Kasemilan, Batang Merangin
Manolah Pegang Rajo Karban?
Megang sambilan larik puncak Palembang.
Satu, Di palembang;
Duo, di Bangka Ulu;
Tigo, Lahat;
Empat, Tebing Tinggi;
Limo, Limun;
Enam, Batang Asai;
Tujuh, Rejang Ulu Musi;
Lapan, Ketaun;
Semilan, Seblat ditunggu Sultan Juru Batu.
Ado Pusako tinggan disitu:
Paratamo, Pemarap;
duo, Paratin;
tigo, Pangideh,
empat, Pasirah.
Manolah Pegang Rajo Karton?
Ili Sungai Tereh, sarujen Tanah Abang, sipentinggen Tanah Betawi, tabao laut sabelat kudara, au sarumpun adolah parit yang samambo, adolah pasir yang tarentang. Apolah tando dio ado disitu? Kudateh munjadi elang putih, kubawah munjadi bidai putih, tempat puti budarah putih, kalu dio mudik ke bangkundah, kubangku tinggi, dio baratempat Kuala Jambi, dio tetap Muaro Masumai.
Ado dih Mulayu ngato:
Nak sayo bilang batang tamenggi, batang metimun masak serangkai, nak sayo bilang batang Jambi, so dengan limun batang Asai
4. Batang Tamansi 5. Batang Hari
6. Batang Tebo 7. Batang Bungo
8. Sungai Tabir 9. Pulau Rengas
Disitu pamuncak tanah Jambi, ilir la batin yang sembilan membao kerbau yang sembilan ekor, membao bereh sembilan ratuh, mudik la jenang yang butigo, nepat ku renah salang buku baratemu dengan rajo kito yang batigo urang, kerbau dipotong bereh di anguh, disitulah urang barapadu padat mencacak depati batujuh urang, batakah naik bajenjang turun, disitu diambik tiru turen dan tauladan, dawah dan jawab, bina dan saksi, bungkan terjun yang piawai, tiap-tiap kato adat kato pasko, barasandi kupado cupak yang duo, kato yang empat, nagari yang empat, undang yang empat, adat yang empat.
Manolah dikato cupak yang duo?
Paratamo, cupak asal;
Kaduo, cupak buatan.
Manolah dikato kato yang empat?
Paratamo, mupakat; Kaduo, kato adat; Katigo, kato pasko; Kaempat, kato serak. Manolah dikato nagari yang empat? Paratamo, secupak; Kaduo, Sajaha; Katigo, mekah; Kaempat, Madinah.
Mano dikato undang Undang yang empat?
Paratamo, undang-undang
Luak; Kaduo, undang-undang nagari,
Katigo, undang-undang urang didalam nagari;
Kaempat, undang-undang yang duo puluh.
Mano dikato adat yang empat? Paratamo, sibena adat, ado dalih firmen Allah mengatokan:
’ÎoTÎ) ×@Ïã%y` ’Îû ÇÚö‘F{$# Zpxÿ‹Î=yz
Mako didirikanlah rajo diatas dunia ini dengan pasuruh Aku, jadi wakil Aku, la kato Allahu ta’ala mengatokan suruh dikerjo tegah dihenti sah dipakai batal dibuang.
Kaduo, tara adat;
Katigo, adat yang diadatkan;
Kaempat, adat jahiliyah.
ManomDepati Batujuh Urang?
Paratamo, Depati Satio Rajo:
Pandai mungiyo kato rajo, pandai mungiyo kato jenang, dio tinggan dilubuk Gaung Para Mentin Rio Mengalun,
Duo: Depati Satio Nyeti,
Pandai mumeti kato rajo, pandai mumeti kato jenang, dio tinggan dibukit batu, berak biru tebu seringit, paramenti rio sari.
Katigo Depati Satio Nyato,
Pandai munyato kato rajo, pandai munyato kato jenang, dio tinggan durien ditakuk rajo, paramentin Riomentin.
Depati nan batigo tinggan di barauh dengan manunggu Kerinci ndah dengan manungggu Kerinci Tinggi, mano dikato Karinci ndah? Ialah renah salong buku, manolah dikato Kerinci tinggi? Iolah alam pangken jambu, urang pasirah parantin tuo, urang parantin yang duo beleh seluk awai baringin sanggun.
Urang sakanci maro siau, dio tetap di koto tampon Sarampi Ndah Sarampi Tinggi, kalu dio mudik nak kemumu, taratak ke tanah semeran agung, Semeren Agung Tanah Undan-Undang, Seleman Tanah Mundapo, tempat Basusun Depati Empat Dengan Sepan Helai Kain, urang batau diujung tanjung, urang mulanca diair mulin, rajo jauh dipangginnuntung, rajo parak dipanggin sirih, rajo dekat dipanggin kato.
Depati yang empat balik ke Alam Kerinci tarajun ke bangka dalam, membao galiwang yang tigo belah, mumbao tumbak yang tigo batang, mumbao rutan yang tigo lidi.
Mano dikato depati yang baraempat urang?
Paratamo Depati Maro Langkap,
Pandai munangkap kato rajo pandai munangkap kato jenang, dio tinggan di Tamia.
Duo Depati Rencong Telang;
Pandai munerang kato rajo, pandai munerang kato jenang, dio tinggan dipulau Sangkar.
Tigo Depati Biong Sari,
Pandai mumiong kato rajo, pandai mumiong kato jenang, dio tinggan di Pungasi.
Empat Depati batu Ampa,
Pandai mungampa kato rajo pandai mungampa kato jenang, dio tinggan ditanah samiran agung, samiran agung tanah undang-undang Saliman Tanah Mundapo, tempat basusun depati empat dengan selapan helai kain,nurang lulo bakain tunggan urang seorang bunamo duo.
Mano uteh dinge bateh Depati Empat Dinge Sehelai Kain, kubawah arun dalam, kudateh tebing tinggi, tanjung baringin, pulau gaading, kayu embun bajaja tigo, kalu sahinggo itu ile ingatkan dio depati empat kalu sahinggo itu mudik ingatkan kito selapan helai kain, kalu sungai sudah bubatang kalu tanah sudah bugabung kalu genggam sudah buuntuk ingat kunamo masing-masing.
Apo panuo uteh dinge bateh ado Pamangku Balimo Urang,
Mano pamangku balimo urang? Pertinggi Tanjung Belit Kartan batunditunggu pamangku balimo urang, mano pamangku balimo urang?
Paratamo Pamangku Sayo Rajo,
Dio tinggan dikoto Petai. Duo Pamangku Cayo Rajo dio tinggan Semerap Ujung Pasir.
Duo Pamangku Cayodarajo,
Dio tinggan Samirah Bungo Tanjung, orang batelap dibau ipuh, orang betarap dibatu belang.
Empat Pamangku Dirajo,
Dio tinggan Sabukar Koto Iman, Pamangku Malindiman ditanjung Tanah capikau urang tuo dahin nengaka rajo mengernah mengernahkan uteh dinge bateh.
Apo panuo uteh dinge bateh?
Ado lantak yang tigo jenjang
Satu disaliman,
Duo ditanah rawang,
Tigo di semurup.
Apu panuo lantak yang tigo jenjang?
Adalah tanah yang tigo,
Satu disaliman,
Duo ditanah rawang,
Tigo disemurup.
Apu panuo tanah yang tigo jembo?
Ado piagam yang tigo pucuk, mano piagam yang tigo pucuk?
Satu disemurup,
Duo ditanah rawang,
Tigo disaliman.
Dio tataruh dihiang Tinggi, apo sebab dio tataruh disitu? Dio itu anak butino dalam, bekembang lapik bukembang tika, bapiuk gedang batungku jarang.
Kalu dio duduk diseleman, gela depati batu ampa, pandai mungampa kato rajo, pandai mungampakan kato jenang, dio anak buah depati empat.
Kalu dio duduk di hiang tinggi gela depati atur bumi sirahmato, pandai mungatur kato rajo, pandai mungatur kato jenang, dio itu anak batino kito selapan helai kain.
Tatkalo maso agidulu mano jalan balik alam kerinci adalah lawang yang tigo,
Manolah lawang ang tigo?
Paratamo lawang cureh cermin, mudik dari jambi,
Duo dinge sureh penggan, yaitu jalan tengku regen Tanah Indrapuro diateh Bukit Paninjau Laut lik balai baratapkan ijuk.
Tigo dinge lawang sureh lipan, yaitu turun dari Koto Limau Manih dialam Kerinci Ini.
Paratamo tarak,
Kaduo koto,
Katigo dusun,
Kaempat nagari,
Kalimo mandapo,
Kaenam pelak yang barajumpuk,
Katujuh pancalo,
Kalapan banja parajilo panjang,
Kasimilan pungguk.
Tatkalo maso agi dulu, Kurinci itu belum bugela Kurinci, agi bugela alam kunci, semurup belum bugela semurup, agi bugela antau limau purut, sulak itu belum bugela sulak, agi bugela padang jambu alo, kemantan itu belum bugela kemantan, agi bugela pasir tarentang, rawang itu belum bugela rawang, agi bugela padang serai munanti, riang itu belum bugela riang agibugela bukit kajang selapak urang bakuto kuto jalatah, sungai penuh itu belum bugela sungai penuh agi bugelapadong imbo lulong, urang bapundokkan Pundok Tinggi orang bakuto Kuto Pandan, mandangkan Kuto Limau Manih. Pucuk Jambi tipu Palembang, pelit ladeh palito Kubang, Tinggi langgak Urangkkuto Payang, gedong unggoh Belui, Tebat Ijuk, Koto Majidin, Sombong Semurup, Takbu Sulak, Pucuk baso Pendung Kumantan.
Mano Mandapo yang Selapan?
Tigo dile empat tanah rawang,
Tigo dimudik empat tanah rawang.
Mano Mandapo yang Tigo Dile itu?
Paratamo disaliman,
Kaduo di tanah riang,
Katigo dipanawa.
La empat ditanah rawang depati punggung sepenuh bumi, orang manaruh mandapo balun. Mano mandapo tigo dimudik?
Satu disemurup,
Duo dikemantan,
Tigo di depati tujuh
La empat ditanah rawang , depati mudo tacuguk kening tarawang lidah, ado pasko tinggan disitu batumbak belang bajangguk jenggi, bajumbak meh bajamun pirak, orang manaruh mandapo tap:
Mano lah uteh dinge bateh urang sungai penuh, dinge anak urang tanah kampung, kudateh batu basiding, kubawah bukit kemun, taginsi tanah kampung kecik teruh kupado seri abu lapeh kumaro air hitam, bateguntalang manio lantak meh bajaja tigo.
Sapu dinge nunggu biden belah dair belah ilir, gela depati yang baula tungun lik pane bajaja tigo.
Sapu dinge nunggu biden belah mudik gela pamangku suko rami.
Sapu dinge nunggu biden sebelah tengah bela ile, gela datuk marajo hitam, tunggun tanah kampong dusun yang empat.
Sapu dinge nunggu biden be;lah mudik, depati senggo rapi, anak urang sungai penuh pegaai ajo pegawai jenang.
Apu dinge nunggu bideng belah dahat belah ile kabingin sati, sapu dinge nunggu mudik depati payung mana Raja duo, anak urang pondok tinggi.
Sapu dinge nunggu bideng belah mudik? Gela Datuk Marajo Hitam, anak Urang Sungai Liuk menaruhkan arah sembilan bidang, menaruhkan tebat gedang sembilan panggung, menaruhkan pelak sembilan jumbo, menaruhkan kulapo sembilan batang, kalundio mudik kutanah Sulak Ala Pandak Ala Panjang, mano dikato ala pandak? Iyo didahet Sulak Gedang, urang bakuto Kuto Jering, mano dikato Ala Panjang? Iyo didahet Sulak Kecik, Urang Bakuto Kuto Jeli.
Manolah uteh dinge bateh kito Tigo Luhah Pamuncak Tanah Mandapo Semurup dengan Mandapo Tanah Rawang?
Kudateh bukit kepak, kubawah tempatmngabi aceh, atiyo bayo teruh kumaro sekungkung mati, lepeh kumaru sungai dereh, teruh kebalai beratap ijuk dikoto tuo, mendaki bukit sepunjung teruh ke karamanio ta tepat ke gunung bujang, jalan teruh betung belarik terjun kearun dalam, teruh ke telun berasap, lepeh ke lubuk buih baratemu Rio Mungempai, rio mengundan duduk bajuntai diateh aka, Gela Panglimo Sirah Mato, itu tunggu ulu Sungai Tabir.
Kalu sehinggo itu kiun ingatklan dio nian, kalu sahinggo itu kumahin ingatkan kito tigo lurahnpamuncak tanah Mandapo Semurup.
Tasiku gunung gurapi teruh ke gunung tirai embun lepeh ke bukit amparan kain, teruh ke gungung kuduk jawi, lepeh ke batu sikai kambing, bara tamu rian batuah rajo bungsu, bajumbak putih bajanggut merah batulong abang, diam dibekuk sungai pagu, kalu sahinggo itu kiun ingatkan dio nian, kalu sahinggo itu kumahin ingatkan kito Tigo Luhah Pamuncak Tanah Mandapo Semurup.
Terjun alu parindu teruh ke bukit linkung badegunkke gunung bungkuk, kalu sahinggo itu kiun ingatkan urang pasimpan di koto enau, kalu sahinggo itu kumahin ingatkan kito Tigo Luhah Pamuncak Tanah Mundapo Semurup.
Terjun ke muaro telang nak munjalong sungai linguh, tarantak ke sako kecik, baratamu dinge datuk Menda Mentin Limo Puluh.
Tatakalo maso agi dulu, cabikkan sirih temihkan pinang, ado buet dinge janji sadu budama kupalo tupai, sadu ba ungko bakua itulah pegang dio nian.
Manolah pegong kito Tigo Luhah Pamuncak Tanah Mandapo Semurup;
Sadu nangrunyam kayu ksigi, satu bakayu kayu kemenyan sadu bukarau abang pipi, sadu babungo bungo rampai, bungo satundun sebelah hari[1] itulah pegang kito tigoluhah pamuncak tanah mandapo semurup.
Sapu dinge nunggu biden sebelah dair belah dile, gela depati kuning kudrat, depati ngalih bapayung alam palito main ilang dilaman, sapu dinge nunggu bien belah dimudik, Gela Depati Semurup Sirah Mato, Depati Semurup anggonalo, Depati Semurup Tanah Napuro, Depati Semurup Kara Satio, Depati Semurup Ijung Karti.
Sapu dinge nunggu biden belah tengah belah ile,Ngela Bujang Pariong Putih balam lapa anak urang Rawang Koto Baru.
Sapu dinge nunggu biden belah mudik? Gela Depati Pajinak Tap
Sapu dinge nunggu biden belah dahat belah ile, Gela Ijung Pajinak Putih, bara tumbuk sari Jung Panjang, orang duduk dipintu gedang, orang bajuntai dipintu kecik, kudarat babungo kayu kulembak babungo air, belah ile Sari Jung Panjang, bela mudik Bensu Dirajo, belah tengah tempat yadun kedarat ketap baleguh, teruh ke guguk batungku tigo, lepeh ketebat di lupak mendaki batang cimeteh, teruh kebukit sarong imau ta tepat gunung maninjau jalan teruh ke air nyuhuk.
Ke lembak tanah mungguk malintang lisut ampo pedang baperit, aru dalam pungala timawak bulebuk tudung ngapuk, lubuk sakijong tudung anyut teruh ke marop sungai mancur, mendaki ke koto ubi, jalan teruh ke padang talang tatepat ke gunung bujang.
Semurup kotak yang enam ditunggu Depati Batigo Urang Pamangku Yang Baduo Ninik Mamak Paramenti Yang Selapan.
Mano dikato kotak yang enam?
Paratamo dikoto tengah, kaduo dikoto mudik, katigo dikoto dair, kaempat di kot datuk, kalimo di koto cayo, kaenam di koto duar
Mano Depati Batigo Urang?
Paratamo Depati Mudo, Kaduo Depati Kupalo Sembah, Katigo Depati Rajo Simpan Bumi.
Mano pamangku yang baduo?
Paratamo Pamangku Rajo Tuo,
Kaduo Pamangku Kepalo Rajo Dinge balik ke muara semerah.
Mano dikato ninik mamak paramaenti yang selapan?
Paratamo, Ijung Pati Jadi Tuo,
Kaduo Ijung Tuo,
Katigo Ijung Panjang,
kaempat, Ijung Mamat,
kalimo Ijung Manalo,
kaenam Ijung Kecik,
katujuh Ijung Pajinak,
kalapan Ijung Karti.
Satu Depati Mudo apu kagedong dio?
Megang kerat kudungbgabung tanah pancung sulor rendam sati, pancang areh random kudalam tebu panjang kuladi besi, apolah pangket umah gedang dio disitu tataruh pisau kulam yang sabilah, disitu tataruh tembo utan tembu tanah, disitu tataruh iku kain kepalo kain[2].
Kaduo Depati Kepalo Sembah apo ka gedang
Dio disitu tataruh kapokat yang gedang disitu tataruh ambung yang liba, apo pangket umah gedang dio namonyo rek warnanyo intan kum Gumalo Bumi Rajo.
Katigo Depati Rajo Simpan Bumi,
Apu ka gedong dio dio megangkan lantak idak guyah megang, kait yang idak sekah, megangkan tali idak putuh, apu pangket uma gedang dio disitu tataruh kungkung padi yang gedang, disitu tataruh tanduk kerbau yang sabuah disitu tataruh cermin yang amat terang disitu tataruh terapong yang amat teruh, menerupong anak buah anak kemenakan.
Depati Mudo duo dukung empat anak, mano dikato dukung yang duo?
Paratamo: sutan depati tuo
Kaduo: sutan depati kepalo rajo
Mano dikato anak yang empat?
Paratamo: datuk kayu hitam
Kaduo: datuk dewo nyato
Katigo: datuk mentin ilang dilaman
Kaempat: datuk panghulu dinge balik ke Sulak Mukai Ilir
Ado dih mulayu ngato:
Budering munutuh sigai, lambio dipanjat jangan , bia tatilin bumi bumi pasimpai karasatio di asak jangan.
Duo dih Mulayu ngato:
Kerat dikerat batang karton, sudah dikerat panjang tujuh, kudarat kumingan kabau, nak muniti benda limo puluh
Sudah dipakai tiap-tiap luak sudah dipakai tiap-tiap larik lain lubuk lain ikan lain padang lain belalang, lain manusio lain adatkan
Tatkalo maso agi dulu: lubuk idak ka kuhong ikan antau diak kakuhong tambun, nagari idak kakuhong adat, gayung idak kakuhong sambut.
Ado dih mulayu ngato,
Rangkam sikumbang jati ketik idak pulang bakudo, patah tumbuh ilang baganti, namun adat, adat pasko sebagaimano simulo.